KALIBO, Aklan—Ginkumpirma it pamunuan it Munipal Economic and Enterprise Development Office (MEEDO)-Kalibo nga kanselado eon ro pagpatigayun it Ati-atihan bazaar ag food festival para sa nagahilapit nga selebrasyon it 2022 Kalibo Sto. Niño Ati-atihan Festival.
Raya hay kasunod it ginpatigayun nga pueong kainang agahon it lokal nga gobyerno it Kalibo.
Suno kay MEEDO-Kalibo Head Mary Gay Quimpo-Joel, ginpakamayad eon lang ni Mayor Emerson Lachica nga kanselahon ro pagtukod it Ati-atihan bazaar ag food festival bangud sa nagatinaas nga kaso it COVID-19.
Tuyo sigon kara nga malikawan ro pagdueotdutan kamana man nga prayoridad it LGU ro kaeuwasan it publiko.
Ginklaro man kara nga owa sanda it ginbaton nga mga payment halin sa igatukod kunta nga bazaar.
Nasayuran nga kaibahan raya sa pilang ka mga aktibidades nga ginpahaum it LGU sa dag-unan nga selebrasyon it Ati-atihan.
Sa makaron, amat-amat eon nga ginbuoe ro mga butong ag iba pang materyales nga pagagamiton kunta sa pagtukod it bazaar.
