KALIBO, Aklan—Gin-engganyo it sangka grupo it mga siklista ro mga pumueoyo nga mag-ehersisyo pinaagi sa pagamit it biseklita.
Sa raya sigon nga pamaagi hay mabuligan ro eawas nga maging mabaskog ag mapaeayo sa stress.
Suno kay Jerico Quimpo, miyembro it Team Angas, masobra daywang dag-on eon ro nakataliwan kat nabilog ro andang grupo kasunod it pagpanaeasa it pandemya.
Haeos adlaw-adlaw sigon nga nagapatigayun it long ride ag recovery ride ro andang grupo para malibot ro tanan nga kabanwahanan sa Aklan ag maskin ro mga kaeapit nga probinsya.
Ro Kalibo Pastrana Park suno kana ro nagaserbi nanda nga lugar para magpahuway matapos ro mahaba nga pagbiyahe.
Ginpahayag pa ni Quimpo nga nagadaea man sanda it pilang kagamitan para engkaso nga may masamaran sa daean hay insigida raya nga maayos.
Ro pagbiseklita sigon hay naging daean man para makakilaea it ibang tawo nga pwede nga maging dugang nga amiga ag amigo.
Gin-engganyo pa kara ro publiko nga umpisahan eon ro healthy lifestyle pinaagi sa pag-ehersisyo kamana man nga likawan eon ro mga bisyo.
