Ro martes hay uman eon man nga nagpataas sa presyo it petroleum products.
Ro diesel hay P6.50 ag ro gasoline hay P2.70.
Kada domingo eon ro pagtaas ag ro balita hay magapadayun pa raya bangud sa invasion it Russia sa Ukraine nga kapin sa syen diyas eon.
Ro masubo, kadungan it pagtaas it gasoline ag diesel, gin-anunsyo man it DTI ro pagpataas it mga nagapangunang kinahangeanon kapareho it tinapay, sardinas, noodles, kape, gatas ag iba pa.
Indi eon sigon mapugngan ro pagtaas bangud nga nagmahae ro sangkap kapareho it harina.
Ro harina hay nagahalin sa Russia apang may una eon nga sanction sa nasambit nga nasyon rason nga indi eon sanda makapag-export.
Ro grabeng apektado it oil price hike hay ro mga pigado.
Owa eon it iba pa.
Apang may una man nga mahimo ro gobyerno para kara.
Raya hay ro pagsuspende sa excise tax it petrolyo.
Kun igapapundo ro tax, maganaba ro gasoline ag diesel ag kasunod ro mga baeak-eon.
Nakabaehag sa Tax Reform for Acceleration and Inclusion (TRAIN Law) nga awtomatikong suspendido ro tax sa petroleum products kon mag abot sa $80 dollars ro kada bariles it langis.
Sobra-sobra eon ro presyo it langis rason nga dapat eon nga suspendihon ro tax.
Apang insigidang nag oponer kato ro Department of Finance sa pagpapundo sa excise tax.
Bukon eamang ro presyo it nagapangunang baeak-eon ro magataas kundi pati ro pamasahe.
Owa pa haeos nakabawi ro pumueuyu sa bangis it pandemya ag maabu pa ro owa it trabaho apang ro pagtaas eon man it petrolyo ag mga nagapangunang baeak-eon ro ginapas-an.
Masolusyunan eamang raya kon temporaryong suspendihon ro excise tax.
Owa eon it ibang pamaagi kundi nga raya.
Pamatian ro reklamo agud nga mapahagan-hagan ro nabatyagan it mga nagarebeldeng tina-i.
