Nagareklamo ro healthcare workers sa mga pribadong ospital bangud nga owa pa sigon ginatau it Department of Health (DOH) ro andang One COVID-19 Allowance (OCA).
Apang suno man sa DOH, na-released eon ro OCA sa tanan nga pribadong ospital sa bilog nga nasyon.
Nagataeang ro healthcare workers ag indi masayuran kon sin-o ro andang pagapatihan.
Suno sa HCWs, kinahangean nanda it allowance eabi eon makaron nga nagataea-as ro mga nagapangunang baeak-eon pati pamasahe.
Hasta hin-uno magahueat ro mga healthcare workers.
Ro makarondaya nga atrasadong pagtau it allowance ag mga benepisyo ro nagaduso sa HCWs agud nga mag-resign ag mag-usoy it trabaho sa ibang nasyon.
Mas may puturo sanda sa ibang nasyon bangud nga mabahoe ro sweldo.
Makangawa-ngawa kon ham-an nga naatrasar ro pagtau it allowance sa pihak nga may laye eon angot kara.
Ginpirmahan eon ni Pres. Rodrigo Duterte ro Republic Act 11712 (Public Health Emergency Benefits and Allowances for Health Care Workers Act).
Tuyo kara nga mataw-an it dere-deretso nga benepisyo ro public ag private health workers sa tiempo it COVID-19 ag sa mga posible pang matabu nga public health emergencies sa paeaabuton.
Sakop it laye ro tanan nga health care workers anuman ro andang employment status sa tiempo it COVID ag iba pang gulping sakit nga magapanaeasa.
Sa idaeum it laye, ro tanan nga health care and non-health care workers hay makabaton it health emergency allowance sa kada buean it andang serbisyo sa tiempo it pandemya depende sa risk exposure categorization: P3,000 para sa mga nagatrabaho sa low-risk areas; P6,000 sa “minimum risk areas; ag P9,000 sa “high-risk areas.
Makaron nga nagataas eon man ro kaso it COVID, ro healthcare workers eon man ro maga-atubang sa pasyente ag igahaead ro kaugalingon.
Nagakadapat eamang nga itau ro andang kinahangeanon.
