Ko Lunes it hapon hay ginpatigayon ro kauna-unahang State of the Nation Address (SONA) ni Pangueong Ferdinand ‘Bongbong’ Marcos, Jr., ro ika-17 nga presidente it Pilipinas.
Haeos tanan hay nag-abang sa magiging sueod it diskurso nga imaw mismo ro nagsueat.
Milyun-milyon ro nagpamati sa anang mga plano sa sueod it an-um nga dag-on nana nga pagpanerbisyo bilang ama it nasyon.
Kasunod kara hay ro mga “kunta” it publiko
Kunta hay ginplastar ro konkretong plano kontra sa COVID-19.
Kunta hay ginhathat ro mga programa kon paalin nga makabangon ro pangabuhian , paalin nga makabukas ro maabu nga trabaho.
Kunta hay may diskarte kun paalin nga paga-atubangon ro mga pagtaas sa presyo it mga baeak-eon ag serbisyo ag kun paalin nga mapugngan ro gutom.
Kunta hay may mga bag-ong pamaagi kon paalin nga matapna ro mga saeot nga illegal nga droga ag pagpangibabaw it nagkaeain-eain nga krimen sa nasyon.
Kunta hay may solusyon eon agud nga maduea sa gobyerno ro mga korup nga dugang nga nagapa-antus sa pilipinas.
Mataeupangdan nga ro mga nasambit nga “kunta” ngara hay naging “kunta” man it mga nagtaliwan nga administrasyon.
Raya hay nagakahueugan nga padayun gihapon ro away sa pandemya, kapigaduhon, korupsiyon ag krimen.
Ag kapareho it pirme naton nga ginahambae, indi raya masarangan nga naga-isaeahanon it pangueo anuman imaw kamayad kaibahan ro anang mga gabinite.
Posibleng natak-an eon kita sa ginahambae nga “pagkaeasugot” apang raya ro kamatuoran.
Raya ro mas matibay naton nga panagang sa anuman nga krisis.
Kun kita hay magabuylog sa tinutuyo nga maging maayos ag maumwad ro Pilipinas, mas madali eon agud nga maging haum ag umpisahan ro unang tikang paagto sa sangka direksyon, ro pagpamayad sa atong pangabuhian .
