Matapos ro natabu nga mabaskog nga paglinog sa Luzon nga sumentro sa Abra, may panawagan it uman si Pangueong Ferdinand Marcos Jr., angot sa pagbuhi sa mandatory Reserve Officers Training Corps (ROTC) sa mga eskwelahan .
Posibleng nakita it pangueo ro importansiya it disaster preparedness skills, partikular sa mga pamatan-on nga posibleng imobilisa engkaso nga makaangkon it mga grabeng kalamidad sa nasyon.
Bukon eamang it pagiging makabayan ro ginatuyo sigon sa ginaduso nga mandatory ROTC, kundi nga mapahaum man ro mga pamatan-on agud nga makabulig sa gobyerno sa anuman nga pamaagi eabi eon sa mga disaster response.
Kon paga-isipon, manami gid man ro katuyuan it ROTC nga sambilog sa mga nagatau it disiplina sa mga pamatan-on nga estudyante.
Nakaangkon eamang it mancha bangud nga maabu sa mga nagpatuman kara kato hay nag-abuso.
Rason nga raya ro ginakabaeak-an it mga ginikanan nga nagakontra kara.
May mga kabuhi nga nauyang bangud eamang sa pilang mga naga-abuso kara.
Imbes nga tur-an sa pagiging makabayan, ginapatigayon ro mga hazing nga kuno hay para sa brotherhood.
Medyu fraternity eon ro nagakatabu.
Hayagan man nga naging ugat raya it korapsyon.
Ro mga estudyante nga may ikasarang nga magbayad it mabahoe nga kantidad, nagabayad eon lang sa mga nagadumaea agud nga makapasar nga indi eon kinahangean nga magsunod sa mga pagmartsa ag training.
Engkaso nga eubusan nga maaprubahan ro pagbalik it ROTC, kabay nga masiguro nga indi eon mauman ro mga naging madueum nga hitabu ko nagtaliwan , ro hazing ag ro korapsyon nga dapat nga matutukan.
Magtaeana it mabug-at nga penalidad sa mga nagadumaea nga maeakot sa makarondaya nga anomaliya .
