Target it Sugar Regulatory Administration (SRA) nga maipaguwa ro sugar order para sa importasyon it 150,000 metriko toneladang asukar makaron nga Setyembre.
Suno kay SRA acting Administrator David Alba, target nanda nga maipaguwa ro Sugar Order No. 02 sa katung-anan it Setyembre agud nga insigidang maka-abot sa nasyon antes ro pagbalik it operasyon it atong sugar refineries nga kaeabanan nga naga-umpisa sa katung-anan it Nobyembre.
Ro tikang it SRA hay kasunod man it rekomendasyon ni Pangueong Ferdinand “Bongbong” Marcos Jr., nga imaw man ro sekretaryo it Department of Agriculture (DA) nga mag-import it 150,000 metric tons it refined sugar agud nga maging stable ro presyo it asukar sa merkado.
Nauna eon nga ginkumpirma sa pagpamati it Senate Blue Ribbon Committee ko Martes ni Executive Secretary Vic Rodriguez nga gindesisyunan ni Pangueong Marcos ag ko SRA Board nga tunga-on ro 150,000 metric tons it iga-import nga asukar kun sa siin 75,000 metric tons kara hay igatigana sa industrial use samtang ro nabilin hay para sa home consumption.
Naga-abot sa 300,000 metric tons it asukar ro kueang nga supply makaron sa nasyon bangud man sa kahalitan it Bagyong Odette sa sugar producer ko nagtaliwan nga dag-on
