Igapatuman eon makaron it Banga-Kalibo jeepney Transport Service Cooperative ro daywang piso nga dugang sa pamasahe sandig sa taripa nga aprubado it Land Transportation and Franchising Regulatory Board ukon LTFRB.
Suno sa chairman nga si Leandro Lenciano, ro nasambit nga taripa hay epektibo pa kunta ko Hulyo 1 it presenteng dag-on apang ko katapusan eamang it nasambit nga buean nana raya nabueo rason nga ulihi man ro andang implementasyon.
Ginpaathag nga ro dating 20 pesos nga pamasahe sa regular commuters hay magiging 22 pesos eon raya sa makaron.
Samtang, 18 pesos man para sa mga estudyante, senior citizen ag person with disabilities ukon pwd’s bilang diskwento sa andang pamasahe.
Aminado si Lenciano nga ko una hay 20 pesos gihapon ro ginasukot it ibang miyembro nanda bangud nga uwa pa haeos it klase ag uwa pa nagafixed ro presyo it produktong langis.
Apang makaron nga una eon ro andang taripa hay uwa eon it rason para inde sanda magta-o it diskwentro sa mga kwalipikadong commuters.
