Sa mga nagtaliwan nga domingo, sunud-sunod ro mga nabaton nga ‘bomb threat’ it pilang eskwelahan sa Metro Manila ag may nailista man sa probinsiya.
Kon makarondaya ro mga nababaton nga pagpamaeag bukon eamang sa mga eskwelahan kundi maging sa iba pang taeatapan ukon establisimento, ginakabig raya nga seryosong bagay.
Ibang klase man nga maghinangae ro mga eakot kara, owa it pakialam sa andang maperwisyo ag maaapektuhan.
Kaeabanan nga nasuspinde ro klase, kon may nababaton nga mga makarondaya nga paeag.
Kanugon ro tiempo nga dapat hay gina-ubos sa pagtuon.
Nagatuga man raya it grabeng pagkabaeaka ag kahadlok sa mga estudyante , manugturo ag mga ginikanan.
Ro sa likod it bomb threat sa Ponciano High School sa Cubao, Quezon City, arestado eon.
Raya hay sangka 22-anyos nga Grade 8 Alternative Learning Student (ALS).
Suno kana nga napag-tripan eang sigon nana nga magpadaea it bomb threat.
Patong-patong ro anang paga-atubangon nga kaso bangud sa bukon it manami nga joke.
Kabay nga raya hay maging leksyon man sa pila nga mahilig maghinangae ukon owa gina-isip ro magiging resulta it andang padasu-dasu nga hilimuon.
I-eakip pa kara ro pilang nauso nga ‘prank’ it pilang vlogger, nga kun amat hay naga-sobra eon.
Kun ro andang gusto hay mag-entertain eamang , naga-abuso eon ro iba nga owa sa lugar.
Kan-o eamang hay daywang prank vlogger ro gin-aresto sa Davao de Oro.
Nagpakuno-kuno ro sambilog sa mga raya nga nakainom it gasolina ag umarteng nagbuyog ro ueo ag nagpaeanuka.
Insigidang rumesponde ro mga rescuer nga ko ulihi nasayuran nga joke eang gali ag para sa content it andang vlog.
Prank joke nga perwisyo ro gintuga.
Matsa makarondaya man ro mga eakot sa pagpadaea it ‘bomb threat’.
Kun pwede mas mabug-at nga penalidad ro ipapanaog sa mga tawong madakpan nga eakot sa makarondaya nga hilimuon agud nga mamadla ag indi eon mag-uman.
