KALIBO, Aklan–Nag-umpisa eon sa pagdagsa ro mga bumaeakae sa mga flower shop sa kahabaon it Roxas Avenue, Kalibo makaron nga Valentine’s Day.
Suno kay Evelyn Vasquez, sangka flower vendor nga temprano pa eamang hay bumuhos eon ro mga elementary student sa andang stall para magbakae it artificial flower nga igatao sa andang mga manugturo.
Patok sigon sa mga unga ro pagbakae it artificial nga bueak bangud mas barato ro presyo kara.
Samtang, masami sigon nga nagadagsa ro mga bumaeakae pag-abot it udtro adlaw hasta it gabi-i.
Ginpaathag man kara nga owa eon it pagbag-o sa presyo it andang ginabaligya nga mga bueak kung siin ro sangka stick it naka-arrange nga rosas hay mabake sa balor nga P150 samtang ro tatlong stick nga naka-set up eon hay P500 ag ro half dozen hay P1,000.
Ro red roses sigon ro pinakamadahog sa tanan nga klase it bueak sa raya nga okasyon.
Sa pihak nga parte, todo effort man ro sangka soltero para sa anang nobya.
Suno kay Marvin Binauhan nga maskin masobra sang buean pa eamang ro andang relasyon hay gusto gihapon nana nga surpresahon pinaagi sa pagtao it boquet of roses ro anang girlfriend.
Nagapati imaw nga sa raya nga pamaagi hay mas maipakita ag mapabatyag nana ro pagiging espesyal kana it anang nobya.
Sa pag-istorya ni Marvin haeos ap-at nga dag-on nana nga ginpangasawa ro anang nobya.
Presente sigon imaw nga nagatrabaho sa isla it Boracay ag nagtabok eamang it Kalibo para makaibahan ro nobya ag magselebrar it Valentine’s Day.
