KALIBO, Aklan—Kasunod sa pagdumdom sa World Tuberculosis Day, ginpaathag it sangka eksperto kon paano nabubuoe it sangka tawo ro sakit nga tuberculosis ag kon paano raya mabueong.
Suno kay Dr. Glenford Refre, sangka internal medicine-adult polmunology nga ro tuberculosis ukon TB hay sangka impeksyon nga masaming nakakaapekto sa baga ag pwede man nga kumalhit sa ibang parte it eawas kaparehas it utak, bato, ukon spine.
Halin sigon raya sa bacteria nga nagakalhit halin sa sangka tawong may TB sa pamaagi it pag-ubo ukon paghatsing it mga maisot nga droplet sa hangin.
Suno pa kay Dr. Refre, maskin sin-ong tawo hay pwedeng makaangkon it tuberculosis apang may mga partikular nga factor nga nagapataas it tyansa nga matapnan kaparehas it mahina ro resistensya it eawas, naga-istar sa polluted nga lugar, may bisyo kaparehas it pagpanigarilyo ag pag-inom it aeak ag maabong iba.
Bangud kara, kinahang-ean nga magpaidaeom ro tawong may TB sa pag-inom it bueong nga nagabuhay it an-om nga buean agud eubusan nga matapna ro bacteria ag malikawan ro pag-angkon it antibiotic resistance.
Kon inde sigon mabueong ro impeksyon hay pwede raya nga magtuga it malala nga baeatian ukon magaresulta sa kamatayon.
