KALIBO, Aklan–Ginaplantsa eon it barangay council it Tigayon, Kalibo ro mga tikang agud nga masiguro ro seguridad ag kaeowasan it mga bisita ag debotong magadagsa sa ginadayo nga Bukid Tigayon makaron nga Semana Santa.
Suno kay punong barangay Gil Morandante it Tigayon, Kalibo nga kaibahan sa andang ginapreparahan hay ro pag-ayos sa daeagan it trapiko pasueod sa nasambit nga tourist spot eabi pa ag nakaangkon eon sigon it highway maeapit sa lugar.
Posible suno kana nga sa Lunes hay magahinun-anon eon sanda it municipal tourism office it LGU-Kalibo agud nga matalakay ro mga tikang nga pagahimuon para sa nagahilapit nga obserbasyon it Semana Santa umpisa sa Abril 2 hasta Abril 9.
Kaibahan kara ro pagpabilin it peace and order sa pagpanguna it kapulisan, rescue group, auxiliary police ag mga tanod.
Nagapati si kapitan Morandante nga magabuhos ro mga deboto makaron nga dag-on kasunod it paghaeuga sa mga restrictions angot sa covid 19 pandemic.
Ginpahayag dugang nga kon ano ro ginpatuman nanda nga mga patakaran sa pre-pandemic hay raya man ro andang pagasundon makaron kaibahan ro one-entry, one-exit policy, no vendors allowed sa mismong bisinidad it Tigayon hills ag ro pagbantay sa andang mga personal nga kagamitan.
Plano man nanda nga uman nga buhi-on ro pagbaligya it mga produkto nga halin sa barangay nga ginatawag nga “Bugna it Tigayon” kun sa siin may gintaeana nga lugar para kanda.
Madumduman nga ro Bukid Tigayon hay ginadagsa it mga pilgrims kada kuwaresma agud nga magpatigayon it station of the cross ukon via crucis para sa pagpabaskog it pagtu-o ag pagpamasyar eabi eon ro mga nature lovers.
