KALIBO, Aklan—Nagapabilin nga insurgency free ro bilog nga probinsya it Aklan.
Raya ro ginkumpirma ni Atty. Flosemer Chris Gonzales, tagapaghambae it Regional Task Force to End Local Communist Armed Conflict (RTF-ELCAC) matapos ro ginpatigayon nga committee hearing it natungdan nga komitiba it sangguniang panlalawigan angot sa estado makaron it probinsya.
Raya hay kasunod man sa engkwentro nga nag-eontad sa tunga it tropa it Philippine Army ag New Peoples Army sa kabukiran nga sakop it banwa it Libacao ag ro extortion sa sangka negosyante nga ro entrapment sa suspek hay natabo sa banwa it Makato.
Ginpaathag ni Atty. Gonzales nga ro nasambit nga mga insidente hay inde makabig nga parameters agud nga ideklara nga bukon eon it insurgency free ro Aklan.
Mag-eowas kara, uwa man it territorial command ro NPA sa probinsya.
Sa pihak kara, nag-apela it suporta ro RTF ELCAC sa publiko sa padayon nga pagpromote it kalinungan sa Aklan.
