KALIBO, Aklan — Owa pa it may nabaton ro Commission on Elections (Comelec)-Aklan nga anuman nga kopya it gina-alegar nga ginpasaka nga disqualification cases kontra sa siyam nga mga kandidato sa probinsiya it Aklan halin sa andang central office.
Raya ro ginkumpirma ni Chrispin Raymund Gerardo, tagapaghambae it Comelec-Aklan.
Sa pihak kara, aminado si Gerardo nga sa media eamang nana nasayuran nga may ginpasaka nga reklamo kontra sa pilang mga kandidato sa probinsiya.
Nagpamalibad eon imaw nga magtau it dugang nga mga detalye bangud nga sakop sigon raya it Law Department it komisyon ag magahueat eon lang sanda it anuman nga advice.
Apang sigurado suno kana nga ro tanan nga mga reklamo nga ginapasaka sa Comelec hay ginataw-an it due process.
Ssa pihak nga parte, ginpahayag ni Gerardo nga normal nga kalakaran kada eleksyon ro pagpangampanya agud nga mataw-an it kahigayunan ro mga kandidato nga makapakilaea sa mga botante.
Apang bangud sa mga ginataeana nga limitasyon it komisyon hay indi malikawan nga may pilang kandidato sa nasyon ro nakaka-eabag sa Omnibus Election Code kapareho it vote buying, abuse of state resources ukon pag-gamit it resources it gobyerno eabi eon it mga incumbent nga mga kandidato rason nga kinahangean sigon ro nagakaigo nga pagdahan ag pagsunod sa patakaran it mga kandidato.
Sa complaint sheet, gin-akusahan ro mga kandidato it gina-alegar nga pag-eabag sa Omnibus Election Code kapareho it paggamit sa mga empleyado it gobyerno sa hilimuon nga pang-partido ag pagpanupod it gas vouchers.
Nakabaehag pa sa reklamo ro gina-alegar nga paggamit it mga akusado sa mga gov’t vehicles ag pagpasugot it mga raya nga magsunod ro mga empleyado sa political activities nga hugut nga ginabawae it Civil Service Commission ag maeapnagon nga pagpanupod it gina alegar nga campaign materials, gas vouchers, ag iba pang insentibo nga eabag sa election rules.
Engkaso nga mapamatud-an nga may basehan ro mga reklamo, pwede sanda nga magapangatubang it hasta nagakabuhi nga diskwalipikasyon sa pagbuyot it anumang posisyon sa gobyerno sandig sa Comelec laws.
