NATIONAL News — Ginpamalibaran it Commission on Elections (COMELEC) ro nagakalhit makaron sa social media nga impormasyon nga kun owa it National ID hay indi makaboto sa Mayo 12.
“No National ID, No Vote” ro mismong nakabutang sa nagakalhit nga social media post nga gingamit pa ro logo it COMELEC
Suno sa poll body, owa raya it kamatuoran ag owa raya naghalin kanda.
Ginklaru it komisyon, kinahangean eamang nga magpakita it valid ID kun ro andang identity hay indi ma-verify gamit ro Election Day Computerized Voters List (EDCVL).
“It was not posted on the official and verified social media channels of the COMELEC on any social media platform, Voters will only be asked to present a valid ID in case their identity cannot be verified through the Election Day Computerized Voters’ List (EDCVL),” pahayag it Comelec.
Dugang pa ni COMELEC Chairman George Erwin Garcia, indi kinahangean it maskin anuman nga ID para makaboto makaron nga maabot nga Mayo 12.
