KALIBO, Aklan — Nagakabaeaka si dating Congressman Gary Alejano it Magdalo Party-list sa posibilidad nga ma-dismissed ukon mabasura ro impeachment case ni Vice President Sara Duterte sa senado.
Suno kana nga sambilog sanda sa mga civic society nga nag-file it reklamo.
Duda nanda nga nagahimo eon lang it pamaagi si Senate President Chiz Escudero nga makaangkon it teknikalidad agud nga indi madayun ro impeachment process .
Raya hay matapos nga ginpaisoe nana sa Hunyo 11 imbes nga Hunyo 2 ro pagbasa ukon presentasyon it articles of impeachment.
Ginpahayag dugang nga kon gusto gid man ni Escudero ag iba pang senador nga i-abswelto si VP Sara, dapat nga obrahon nanda raya pagkatapos it impeachment hearing.
Importante sigon nga masayuran it publiko ro kamatuoran ag maplastar ro mga ebidensiya kontra sa bise presidente.
Mayad man sigon raya nga kahigayunan agud nga masabat nana ro mga alegasyon ag mapaathag ro anang parte.
Panindugan ni Alejano nga due process anay antes ro desisyon.
Indi pwede suno kana nga igpiton sa umpisa pa eamang ro proseso it impeachment.
Ro gusto sigon it mga pumueuyu makaron hay makaangkon it transparency ag accountability.
Ginpamilit pa ni Alejano nga sa idaeum it 1987 constitution, gina-manduan ro Senado nga padayunon nga owa it delay ro naumpisahan nga impeachment process.
