KALIBO, Aklan — Naga-abot sa 7,000 hasta 8,000 nga turista kada adlaw ro nagasueod sa Boracay agud nga magbakasyon para sa Bag-ong Dag-on.
Suno kay Caticlan jetty port administrator Esel Flores nga makarondaya man ro daily arrivals ko mga adlaw antes nga mag-Paskwa nga kaabuan hay mga local tourist.
Sa kamatuoran, ko weekend hasta Miyerkules hay nag abot sa haeos 10,000 ro nag-abot nga bisita nga kaeabanan hay nagapabilin sa isla sa sueod it tatlong adlaw.
Bukon pa sigon it kaibahan sa daily tourist arrivals ro mga sakay it cruise ship nga nagdungka sa Boracay ko Disyembre 24 nga ginsug-aeaw it mga Ati-Atihan dancers ag banda samtang nagapanaog sa pantalan.
Sambilog pang cruise ship ro nagdungka, adlaw it Martes, Disyembre 30 sakay ro kapin sa 2,000 man nga mga turista.
Bangud kara, kumpiyansa si Flores nga maabot nanda makaron nga dag-on ro target nga 2.3 million nga tourist arrivals.
Ginadayo sigon it pilang turista ro Boracay kada selebrasyon it Bag-ong Dag-on agud nga abangan ro bonggang fireworks display sa tunga it dagat it mga accomodation establishments.
Bangud sa pag abu it mga bisita, ginpabaskog pa it mga awtoridad ro seguridad sa mga matawong lugar.
Mag-eowas sa mga environmental police, may pilang volunteers man ro nagabulig agud nga mapabilin ro kaayusan ag kalimpyo sa sueod it Boracay.
Sa pihak kara, padayun gihapon ro pagpadumdum sa mga turista nga ipabilin nga malimpyo ro palibot it nasambit nga tourist destination.
