Sa sangka tumaeagsahon nga kahigayunan nga kumibot sa mga siyentipiko sa University of Veterinary Medicine sa Vienna ro kauna-unahang kaso it sangka baka nga kaintigo nga maggamit it “tools” ukon gamit nga may intensiyon.
Ro baka nga nakilaea kay Veronika, hay sangka Swiss brown cow nga alaga ni Witgar Wiegele.
Naboe-an it CCTV nga nagagamit si Veronika it mga stick ag brush pinaagi sa anang bibig agud nga kaeuton ro nagkaeain-eain nga parte it anang eawas.
Suno sa anang amo nga si Wiegele, nag-umpisa ro tumaeagsahon nga ikasarang ni Veronika, 10 dag-on eon ro nakataliwan apang makaron eamang raya pormal nga na-estudyuhan ag na-publish sa journal nga Current Biology.
Bukon it basta-basta ro ginahimo ni Veronika bangud nga nagapakita raya it mataas nga lebel it kaaeam.
Nataeupangdan it cognitive biologists nga sanday Alice Auersperg ag Antonio Osuna-Mascaró nga sayod it baka kun paalin nga gamiton ro tool base sa pagkinahangean kun sa siin ginagamit nana ro mabalahibong parte it brush para sa madamoe nga panit samtang ro matig-a nga bueuytan man hay para sa mga sensitibong parte.
Raya hay ginatawag nga “flexible tool use,” sangka abilidad nga bihirang makita sa mga sapat nga pangbukid.
Suno sa mga eksperto, ro kaso ni Veronika hay hangkat sa mabuhay eon nga pagpati it tawo nga limitado ro kaeam it farm animals.
Ginasuhestiyon sa study nga ro atong manaba nga pagtan-aw sa mga baka hay posibleng bunga eang it kakueangan naton sa obserbasyon.
