Naduean sigon it mabahoe nga pondo ag nagapangatubang sa pangkabilugang pagbagsak ro lokal nga industriya it baboy sa Pilipinas, rason nga nagpaguwa it pormal nga panawagan ro mga grupo it hog producers para sa insigidang pagpataas it taripa ag temporaryong pagpabilin sa pag-import it karne.
Sa tingob nga manifesto it alyansa it mga lokal nga nagaalaga it baboy, ginpahayag nga nagnaba sa P90 hasta P120 kada kilo ro liveweight farmgate price samtang padayon mat-a ro pagtaas it presyo it bahog, rason agud malugi ro mga hog raiser it hasta P9,000 sa kada alagang baboy.
Bangud kara, hinyo it grupo ro madasig nga pagbalik it import tariff sa 40 porsiyento para sa out-quota ag 30 porsiyento para sa in-quota kadungan it pagpatuman it temporary import ban, freeze order sa pagpaguwa it frozen imported pork halin sa cold storage, ag 100% quarantine inspection sa mga dungkaan.
Samtang nagdihon si Senador Francis Pangilinan it Senate Resolution 726 agud imbestigahan ro krisis sa sector it livestock ag poultry, kon sa siin ginatantya nana nga nagaabot sa P250 milyon kada adlaw ro nalulugi sa mga lokal nga hog raiser bangud sa manaba nga farmgate price kumpara sa production cost nga P180 hasta P190 kada kilo.
Gin-insister it senador ag mga grupo sa industriya nga kon inde eagi maagapan ro sitwasyon sa bilig it tamang taripa ag proteksyon sa lokal nga produksyon, maabong hog raiser ro daeayon nga magapundo sa negosyo nga magatuga it mas grabeng pagdepende it nasyon sa imported nga karne ag magadaea sa paeag it national food security.
