Nag-viral ro sangka vlogger sa Guangdong matapos nana nga ipakigbahin ro proseso it anang pag-extract it 191.73 grams nga bueawan halin sa mga lumang SIM cards ag iba pang electronic waste.
Gamit ro complex chemical processes kapareho it strong acid dissolution ag electrolytic reduction, nahimo nana nga “tunawon” ro mga scrap agud nga mabo-oe ro bueawan nga nagabalor it kapin sa 120,000 yuan ukon ginaboeobanta nga P950,000.
Gintawag ro proseso nag “SIM alchemy”. Bangud kara, maabu nga netizens ro nagahandum nga testingan ro proseso para mag-manggaranon.
Sa pihak nga parte, ginklaru it mga eksperto nga “too good to be true” ro video kun paga-isipon nga halin eamang ro mga raya sa ordinaryong SIM cards.
Ro matuod nga gold content it sangka SIM card hay masyadong manaba ukon 0.47 mg, rason nga magakinahangean it haeos 400,000 bilog para mabo-oe ro kaabuon it bueawan nga ginapakita.
Gin-ako man ko ulihi it nasambit nga vlogger nga gumamit imaw it mga gold-plated computer chips halin sa mga electronic components kapareho it sa sueod it computer, cell phone, o servers nga gina-upakan it manipis nga layer it bueawan.
Nagpaandam man ro mga awtoridad nga indi raya pagtuearon sa baeay bangud nga nagagamit raya it mga kemikal nga makahieilo ag delikado sa ikamayad nga eawas ag sa palibot.
