KALIBO, Aklan—Balik eon sa normal ro byahe it tanan nga sakayang pandagat halin sa Caticlan Port sa banwa it Malay patabok sa Batangas, Romblon ag Mindoro vice versa matapos nga nagnaba bilang low pressure area ro dating bagyong Basyang.
Suno kay Richard G. Gura, Station Commander it Philippine Coast Guard, insigida nanda nga gin-abisuhan ro mga shipping lines company nga balik eon sa normal ro byahe matapos nga temporaryo nanda nga ginsuspinde ro pag-eayag it tanan nga klase it sakayang pandagat bangud sa mabaskog nga baeod tuga it pagpanaeasa it bagyong Basyang.
Angot kara, kapin sa 52 nga stranded passenger ag 50 nga rolling cargoes ro andang gin-asisteran hasta sa nakabalik sa normal ro byahe.
Maging ro byahe it mga motorbanca patabok sa isla it Boracay hay gintaw-an nanda it limitasyon para sa kaeowasan it tanan nga mga pasahero.
Nasayuran nga kon ginpaidaeom sa tropical cyclone wind signal ro sangka lugar hay awtomatiking kanselado ro tanan nga byahe it mga sakayang pandagat ag maid-id raya nga ginasikyar it Philippine Coast Guard agud nga masiguro ro kaeowasan it mga pasahero.
