BORACAY Island — Nagtaas it kapin sa 8 percent ro tourist arrival ko buean it Pebrero kon ikumpara sa kaparehong period ko nagtaliwan nga dag-on.
Ginpahayag ni Kathrine Licerio, tagapaghambae it Malay-Boracay Tourism Office, nakalista ro andang taeatapan it kabilugan nga 188,479 tourist arrival.
Sa nasambit nga numero, 133,576 ro domestic tourist; 3,539 ro overseas Filipinos ag 51,364 ro foreign tourist.
Raya hay bangud eon man sa padayon nga promotion it Boracay sa pinaagi it aktibong partisipasyon it lokal nga gobyerno, mga travel agencies, establishment owners, stakeholders ag iba pa sa mga ginapatigayon nga expo.
Ginpahayag dugang ni Licerio nga ro pakikipagbahin sa mga expo hay mabahoe nga bulig agud nga makaengganyo pa it mas maabong turista nga magabisita sa isla it Boracay.
Aminado ro tourism officer nga bukon pa it syento porsyento nga nakabalik ro sektor it turismo sa isla apang ginatinguhaan nanda nga mas pa raya nga mapasanyog eabi eon makaron nga nagahilapit ro summer season.
