Pagahueaton eon lang it transport group sa Aklan ro magiging resulta it pagahiwaton nga pueong, adlaw it Huwebes sa taeatapan it Land Transportation Franchising and Regulatory Board ukon LTFRB Region 6 angot sa ginahirit nanda nga pagpataas it pamasahe.
Raya ro ginpahayag ni Jeorgian Julian, operational manager it New Washington Kalibo Transport Cooperative kasunod it mabahuean nga pagtaas sa presyo it produktong petrolyo tuga it krisis sa Middle East.
Sa makaron hay ginahueat eon lang nanda ro fuel subsidy agud nga makapahagan-hagan sa kalugihan nga andang naeksperyensiyahan sa pagpamasada.
Sa pihak nga parte, ginpahayag dugang nga kaabuan kanda hay ginalimitahan eon lang ro pagbiyahe agud nga makatipid sa petrolyo, kun sa siin, owa eon sanda naga-lagare ukon nagabiyahe it one-way.
Ro andang ginakita suno kana hay indi eon makasabay sa mataas nga oil price hike.
Ro presenteng regular rate nga panuektan sa andang ruta hay P25 samtang sa estudyante ag senior citizen hay P20.
Nakadepende suno kana sa LTFRB kon pila ro igadugang sa pamasahe.
