Nagapanawagan it insigidang pagpasuspinde it fuel excise tax ro grupong Kilusang Magbubukid ng Pilipinas (KMP) agud nga mabuhinan ro kalisod it mga mangunguma sa gastos sa andang pagpanguma.
Suno kay KMP chairperson Danilo Ramos, nabatyagan eon nanda makaron ro kalisod ag kabug-at it andang pagpangabuhi sa bukid bangud sa gulpihan ag mabahuean nga pagtaas it produktong petrolyo masobra sang dominggo pa eamang ro nakataliwan halin kat gingyera it Estados Unidos ag Israel ro nasyon it Iran.
Ginakasubo ni Ramos ro sitwasyon matapos nga nahuhubsan it krudo ro andang mga makinarya sa pagpanguma bangud sa inde nanda masarangan ro kataas it presyo it nasambit nga produkto.
Bangud kara, saligan suno kana ro manaba nga produksyon it paeay, tinuean-on ag iba pang produktong agrikultural.
Samtang ginapabuhay sigon ni Pangueong Ferdinand Marcos Jr. ro anang desisyon hay kapin pang maeogmok ro tanan nga sektor nga posibleng makaapekto sa ekonomiya it Pilipinas.
Gin-insister pa ni Ramos nga kinahang-ean ro madalian nga aksyon ag paghueag it gobyerno bangud nga ro fuel subsidy nga ginapanupod hay bukon it bastante ag band-aid solution eamang sa presenteng ginapangatubang nga krisis it nasyon.
Mag-eowas kara, ginapanawagan man nanda sa lider it Estados Unidos ag Israel nga punduhon eon ro pag gyera sa Iran agud nga inde eubusang maapektuhan ro mga kaeapit nga nasyon.
