Ginpasugtan it International Criminal Court Trial Chamber III ro pag-atras ni Nicholas Kaufman bilang abogado ni dating Pangueong Rodrigo Duterte sa ginapangatubang nga kasong crimes against humanity.
Nagdihon si Kaufman it hinyu ko Mayo 8 matapos sigon nga magdesisyon si Duterte nga magbo-oe it bag-ong counsel para sa anang depensa angot sa war on drugs case.
Suno sa mosyon, naka-istorya eon ni Kaufman ro anang magiging kabaylo ag haum eon raya nga insigidang akuon ro representasyon ni Duterte, kaibahan ro pagtambong sa masunod nga status conference sa Mayo 27.
Sa pihak kara, ginpadumdum gihapon it korte si Kaufman sa anang mga obligasyon sa idaeum it Code of Professional Conduct ag confidentiality rules it Rome Statute ag Rules of Procedure and Evidence.
Nagapabilin si Duterte sa kustodiya it ICC samtang ginapangatubang ro tatlong counts it crimes against humanity angot sa madugong kampanya kontra droga it anang administrasyon.
Base sa datos it gobyerno, masobra sa 6,000 nga katawo ro namatay sa anti-drug operations, samtang masobra sa 30,000 man ro ginaboeobanta sa mga human rights groups, kaibahan ro mga menor de edad.
