Ginkansela ni US President Donald Trump ro nakataeanang panibag-ong military strikes kontra sa Iran matapos nana nga ginhambae nga nakasugtanan eon ro “final points” it sangka paunang kasugtanan para sa kalinong.
Raya hay gin-anunsyo ni Trump pilang oras eamang matapos imaw nga magpaandam it ikatlong magkasunod nga gabi-i it pag-atake it Estados Unidos sa Iran.
Samtang, owa pa it kumpirmasyon angot kara ro Iran. Suno sa semi-official nga Fars News Agency, owa pa sigon gin-aprubahan it Tehran ro anumang pinal nga kasugtanan.
Sa pihak kara, ginpahayag it mga Iranian ag Western sources nga mas ginpabaskog eon ro mga pagtinguha agud nga makabilog it sangka interim agreement. Nagapabillin man ro mahuyang nga ceasefire nga ginpatuman umpisa pa ko unang parte it Abril.
Suno sa tatlong Iranian sources, may nabilog eon nga political understanding apang may pilang importanteng detalye pang dapat plantsahon, kaibahan ro pagpahilway it bilyun-bilyong dolyar nga kita it Iran halin sa langis nga naka-tengga sa mga banko sa ibang nasyon.
Base sa report, temporaryong pagahaeugaan it kasugtanan ro kontrol it Iran sa Strait of Hormuz ag pagatapuson ro blockade it Estados Unidos sa mga pantalan it Iran. Ro mga isyu angot sa nuclear program it Iran ag stockpile kara it enriched uranium hay pagatalakayon pa sa masunod nga mga negosasyon.
Ginpahayag ni Trump nga gin-aprubahan eon it mataas nga lider it Iran ro kasugtanan ag ginsuportahan raya it mga nasyon sa rehiyon kaibahan ro Israel, Saudi Arabia, Qatar, ag United Arab Emirates.
Nag-umpisa ro gulo matapos ro airstrikes it Estados Unidos ag Israel kontra sa Iran ko Pebrero 28. Libo-libong katawo eon ro namatay, kaabuan sa Iran ag Lebanon, samtang naapektuhan man ro pangkalibutanon nga merkado it langis.
