KALIBO, Aklan — Nagpatuman ro Aklan Provincial Government it temporaryong pagbawae sa pagpasueod it mga buhi nga baboy, karne it baboy, ag iba pang produktong may kaangtanan sa baboy halin sa mga probinsiya it Iloilo, Capiz, ag bilog nga Negros Island Region bilang kaparte it mas ginpabaskog nga tikang kontra sa African swine fever (ASF).
Ginpirmahan ni Governor Jose Enrique Miraflores ro Executive Order No. 044 ko Hunyo 23 nga nagatuyo nga pabaskugon ro veterinary quarantine, border control, surveillance testing, regulasyon sa paghueag it mga produktong baboy, ag biosecurity measures kasunod it mga kumpirmado, probable, ag ginadudahan nga kaso it ASF sa mga kaiping nga probinsiya.
Sa idaeum it mandu, temporaryong igabawae ro pagpasueod, pagbiyahe, pagbaligya, distribusyon, ag paghueag it mga buhi nga baboy, karne it baboy, pork products, pork by-products, swine genetic materials, ag iba pang produktong halin sa baboy nga naghalin ukon nag-agi sa mga apektadong lugar.
Ginmanduan man ro mga lokal nga gobyerno nga magbutang it veterinary border control checkpoints ag biosecurity stations sa mga border it probinsiya, mga pantalan, coastal routes, transport corridors, ag iba pang nagapangunang aeagyan.
Igapaidaeum man sa hugut nga veterinary quarantine inspection ro tanan nga mga pantalan, paeuparan, roll-on/roll-off terminals, fish ports, landing sites, ag municipal boundary checkpoints sa pagdumaea it Office of the Provincial Veterinarian.
Kinahangean man nga magbo-oe it Certificate of Acceptance halin sa Provincial Veterinary Office ro tanan nga ginapasugtan nga shipment bago makasueod sa Aklan, kaeakip ro mga kinahangeanon nga veterinary ag transport documents.
Nagpaandam ro provincial government nga pwedeng kumpiskahon, ibalik sa ginhalinan ukon pagasunugon ukon iga-eubong ro mga shipment nga maga-eabag sa mandu sandig sa ginapatuman nga laye ag biosecurity protocols.
Nagpatigayon man ro Provincial Veterinary Office it random sampling, laboratory testing, ag inspeksyon sa mga babuyan, slaughterhouse, baealigyaan, cold storage facilities, ag mga saeakyang nagadaea it produktong baboy agud nga tempramong matumod ro posibleng pagkalhit it ASF.
Ro mga maga-eabag sa executive order, kaibahan r mga trader, transporter, livestock dealer, meat establishment, ag iba pang negosyong may kaangtanan sa baboy, hay pwedeng papanaugan it kumpiskasyon it kargamento, suspensyon ukon kanselasyon it permit, ag permanenteng pagbawae sa pagpatigayon it swine-related business sa Aklan kon pauman-uman ro pageabag.
