Ginpamilit it Estados Unidos nga bukas sa gihapon ro Strait of Hormuz, kabaliskaran sa anunsiyo it Iran nga raya hay sarado sa tunga it mga panibag-ong pagbaeayluhan it pag-atake it magtimbang nga parte.
Madumduman nga uman nga nag-init ro bakbakan ko nagtaliwan nga domingo matapos hambaeon it Amerika nga tinamaan kara ro masobra sa 140 targets sa Iran.
Sabat sigon ro mga mga pag-atake sa pagpunterya it pwersa it Iran sa barkong naga-agi sa Strait of Hormuz, nga naggamit sigon it bukon it awtorisadong ruta.
Ko nagtaliwan nga domingo, pilit nga gina-insister it Iran ro kontrol kara sa nasambit nga aeagyan ag gin-anunsyo nga sarado raya hasta nga makapaguwa it dugang nga notice.
Naglunsar man ro Islamic Revolutionary Guard Corps it Iran it maeapnagon nga pag-atake sa mga base militar it US samtang ginpahayag man it United Arab Emirates, Qatar, Kuwait, Oman ag Bahrain nga andang ginsabat ro missile ag drone strikes halin sa Iran.
Sa pihak it panibag-ong mga serye it pag-atake, ginpahayag ni US President Donald Trump nga pagapadayunon ro mga diyalogo ag paga-testingan it mga mediator nga buhi-on ro peace process.
