Ginmandu eon ni Kalibo Mayor Juris Sucro ro amat-amat nga pagbak-eas sa mga stalls maeapit sa MMG Medical Center sa may San Lorenzo Drive, Barangay Andagao, Kalibo agud nga mapahaeuga ro lugar ag mapamayad ro daeagan it trapiko eabi eon ro para sa mga emergency vehicle ag mga pasyenteng nagakinahangean it insigidang serbisyong medikal.
Raya ro ginpahayag ni Sangguniang Bayan member Ronald Marte matapos nga nagpadaea it sueat ro MMG medical center angot sa epekto nga ginatuga sa andang operasyon it mga stalls sa kilid it karsada nga nagresulta sa pagnaba it numero it andang mga pasyente.
Mag-eowas kara, ginmanduan man sigon nanda ro Municipal Economic Enterprise Development Office (MEEDO) Kalibo ag Municipal Engineering Office nga magpatigayon it imbentaryo sa mga stalls nga owa eon ginagamit ukon owa it naga-okupar.
Ginahinyu sigon it medical center nga antes nga magbukas ro andang new building sa buean it Oktubre hay mahimos eon ro lugar, kun sa siin, naging positibo kara ro sabat it lokal nga gobyerno.
Madumduman nga gin relocate ro mga vendors sa Kalibo Eastern Side Terminal agud nga taw-an it daean ro modernization it public market.
Target sigon it contractor nga matapos ro public market sa Agosto matapos ro pilang beses nga pagpa-isoe it date of completion.
Ginaeauman nga pwede eon nga magamit it mga negosyante ag bumaeakae ro bag-ong tindahan sa tiempo nga makumpleto ro mga nabilin pang pagpahaum ag inspeksyon.
