Sikretong ginsaylo si U.S. President Donald Trump halin sa Air Force One paagto sa sangka mas maisot nga military aircraft samtang sa Turkey ko nagtaliwan nga buean matapos nga makabaton it gina-alegar nga paeag sa anang kabuhi.
Suno kay Trump, mismong U.S. Secret Service ro nagmandu kana nga magsaylo it eroplano matapos ro NATO summit sa Ankara.
Gin-istorya it U.S. President nga ginsaylo imaw halin sa Air Force One sakay it sangka catering truck agud nga indi mahalata nga nagsaylo imaw sa ibang eroplano.
Kaibahan ni Trump sa nasambit nga truck ro pilang mga close aide kara, kaibahan sanday White House Deputy Chief of Staff Dan Scavino, executive assistant Natalie Harp ag Oval Office operations director Walt Nauta.
Owa man gindaea sa pagsaylo ro mga Cabinet official.
Gin-aku pa ni Trump nga mas mataas pa sigon ro peligro sa anang ginsakyan nga eroplano matapos nga raya hay sikretong isaylo bangud nga posibleng makaagaw it atensyon.
Ginsunod eamang nana ro anang security protocol.
Owa man eagi ginsapubliko it White House ro pagbag-o sa flight. Nagapabilin raya nga sikreto hasta nga gin-report raya it Washington Post ko Lunes.
Nasayuran nga nauna eon nga ginsakay si Trump sa sangka bag-ong-renovate nga eroplano nga donasyon it Qatar paagto sa Ankara para sa NATO summit.
Apang sa paghalin nana sa Turkey, gulpi nana nga ginpili nga gamiton ro mas lumang Air Force One.
