Hugut nga ginpamalibaran it Filipino Roblox Developers Association (FRDA) ro panawagang eubusan nga ibawae ro online gaming platform nga Roblox sa Pilipinas.
Suno sa grupo, mas dapat nga tutukan ro mga feature, online community ukon communication channel nga posibleng ginagamit sa mga unga para maengganyo nga maghimo it kinagamo, kaysa sa kabilugan nga pagbawae sa platform.
Sabat raya it grupo matapos hambaeon ni Interior and Local Government Secretary Jonvic Remulla nga posibleng may impluwensya ro Roblox sa 14-anyos nga eakot sa Zamboanga school shooting ko Agosto 18.
Ginpahayag it FRDA, maskin nga eubusan nga ibawae ro Roblox, indi kara mapugngan ro mga tawong naga-engganyo sa mga unga nga magsaylo sa ibang online platforms.
Bangud nga maabu nga servers ag nagkaeain-eain nga klase it content sa Roblox, ginpahayag it grupo nga dapat tumuron anay kon anong partikular nga feature, community ukon communication channel ro may problema bago raya ibawae sa nasyon.
Ginhangkat man it FRDA ro gobyerno nga ipaguwa ro klaru nga ebidensiyang naga-angot sa Roblox sa insidente.
Ginpamalibaran man it grupo ro pahayag nga ro pag-record it insidente gamit ro first-person point of view o POV hay awtomatikong nagakahueugan nga gintuead raya halin sa sangka first-person shooter game.
Dugang pa it FRDA, natural eamang ro makarondaya nga pamaagi it pag-record eabi eon kon naga-isaeahanon ro tawong nagabo-oe it video.
