Sangka 31-anyos nga babaye sa China ro nakaangkon it grabeng problema sa pagtikang ag memorya matapos magpaidaeum sa 15-diyas nga water-only diet.
Suno sa report, nagnaba it 20 kilo ro anang timbang—halin sa 70 kilo hay naging 50 kilo—matapos owa nagkaon it solid food sa sueod it daywang domingo.
Ko ulihi, naka-eksperyensiya imaw it kabudlay sa pagtikang ag problema sa memorya.
Na-diagnose sigon imaw it Wernicke’s encephalopathy, sangka seryosong kondisyon sa utok nga pwedeng magtuga it grabeng kakueangan sa bitamina ag nutrients.
Suno sa neurologist nga si Sun Guifang, naging medyu “penguin” ro pamaagi it pagtikang it babaye bangud sa anang kondisyon ag may posibilidad nga indi eon eubusan nga magbalik sa normal ro anang pagtikang.
Nasayuran nga ginhimo it babaye ro ginatawag nga “bigu,” sangka sinaunang Taoist fasting practice nga ko ulihi hay ginagamit man it pila bilang pamaagi it madasig nga pagniwang.
Nagpaandam man ro mga eksperto kontra sa extreme fasting ag calorie restriction, ag gin-rekomenda ro amat-amat nga pagnaba it timbang pinaagi sa balanseng pagkaon ag regular nga ehersisyo.
