Ginpamilit it Philippine National Police (PNP) nga naging malinong ag maayos ro unang Bangsamoro Autonomous Region in Muslim Mindanao (BARMM) parliamentary elections sa kaabuan nga parte it rehiyon.
Suno kay PNP chief Gen. Jose Melencio Nartatez Jr., may pilang hangkat sa seguridad apang nagapabilin nga maayos ro eleksyon sa haeos tanan nga lugar sa BARMM.
Raya hay sa pihak it mga napabalita nga insidente it pagpamaril, pagsabog ag pagkarekober it improvised explosive device ukon IED ko adlaw it eleksyon.
Sa makaron hay naga-abot eon sa ap-at ro namatay ag 20 nga iba pa ro naninahan sa mga nasambit nga insidente.
Ginpahayag ni Nartatez nga insigidang nagresponde ro mga pulis, gin-ayos ro deployment it andang mga tawuhan ag nakipagbueuligan sa Comelec ag iba pang security forces agud nga malikawan ro pag-grabe it mga insidente.
Padayun man ro maid-id nga imbestigasyon it PNP ag pagpahaum it mga kaso kontra sa mga responsable. Suno sa PNP, kaibahan sa nailistang insidente ro mga pagpamaril sa Basilan, Cotabato City ag Maguindanao del Sur, tatlong pagsabog sa Cotabato City ag pagkarekober it IED sa Basilan.
Samtang, gindayaw man ni Nartatez ro mga residente it BARMM sa andang pagpasakop sa eleksyon sa pihak it mga hangkat, apang ginpahayag nana nga kinahangean nga ipabilin ro seguridad hasta nga eubusan nga maiproklama ro mga nagdaog ag matapos ro election period.
