Ginpuna ni Senator-Judge Raffy Tulfo ro gina-alegar nga pagpanguna ni Impeachment Court Spokesperson Atty. Regie Tongol sa pagpaguwa it timetable angot sa pinal nga pagsentensiya it korte sa impeachment case ni Vice President Sara Duterte.
Sa pagpamati makaron nga adlaw it Lunes, ginkuwestiyon ni Tulfo ro naunang pahayag ni Tongol nga posibleng makaangkon it final verdict sa kaso sa Disyembre 16.
Suno kay Tulfo, nakaangkon it impresyon sa publiko nga nauna eon nga nadesisyunan it Impeachment Court ro magiging resulta it pagbista bangud sa nasambit nga pahayag.
Ginpahayag ni Tulfo nga pilang kakilaea ag amigo ro nagtawag kana agud nga pangutan-on kon nadesisyunan eon ro magiging outcome it impeachment case.
Ginklaru man ni Presiding Officer Chiz Escudero nga bukon it tama ro pahayag angot sa Disyembre 16 nga sentensiya.
Ginpaathag ni Escudero nga ro nasambit nga timetable hay nakabase eamang sa pagsuma halin sa pretrial order, kun sa siin naghinyu ro prosecution it 61 ukon 62 trial days ag 30 trial dates man ro defense.
Ginpamilit ni Escudero nga ro pagsuma hay base sa matematika ag kalendaryo ag bukon sa aktuwal nga daeagan it pagbista, eabi pa ag may mga hearing nga nakansela.
Bangud kara, ginhinyu ni Tulfo kay Escudero nga hambaean si Tongol bangud nga bukon eamang it raya ro unang kahigayunan nga nagpaguwa ro spokesperson it pahayag sa media nga owa pa nakasugtanan it mga senator-judge.
Ginpahayag ni Tulfo nga ginapangunahan ro mga senator-judge sa mga impormasyong ginapaguwa sa media angot sa pagbista.
Ko ulihi, ginpasiguro man ni Escudero nga pagataw-an nana it konsiderasyon ro naging pahayag ni Tulfo ag magahimo it aksyon angot kara.
