Ginaeauman nga magataas ro produksyon it gatas sa nasyon sa masunod nga dag-on sa pihak it paeag it El Niño base sa pagboeobanta it United States Department of Agriculture (USDA) bangud sa naga-eapad nga government-funded nutrition programs, pagbahoe it dairy herd, ag mabaskog nga pagkinahangean it lokal nga merkado ag coffee shop sector.
Ginaboeobanta it USDA Foreign Agricultural Service sa Manila nga naga-abot sa 48,000 metriko tonelada sa liquid milk equivalent ro produksyon sa 2027 halin sa 46,000 metriko tonelada makaron nga dag-on tuga it mas mataas nga imbentaryo ag produksyon halin sa maisot ag mabahoe nga prodyuser.
Gin-report it National Dairy Authority (NDA) nga nagtaas it 6.55 porsiyento ro kabilugan nga imbentaryo it mga sapat nga nagatau it gatas umpisa Enero hasta Hunyo it makaron nga dag-on nga nag-abot sa 165,858 heads halin sa 155,662 heads ko nagtaliwan nga dag-on.
Ginapatuman man it gobyerno ro Animal Industry Development and Competitiveness Act kaibahan ro nagkaeain-eain nga programa nga nagatuyo nga pabaskugon ro sektor, kaibahan ro plano it NDA nga mag-import it 1,600 Holstein-Jersey cows agud nga mapun-an ro mga dairy stock farm sa bilog nga nasyon.
Padayun nga ginapabakod it nasambit nga mga tikang ro lokal nga industriya it oeobrahan it gatas agud nga masabat ro nagatinaas nga demand it mga bumaeakae sa tunga it hangkat it paniempo ag mapamayad ro pangabuhian it mga lokal nga magbubukid.
