Nagapangatubang sa criminal investigation ag impeachment proceedings si Paraguay President Santiago Peña kasunod it pagbagsak it Ueno Bank nga nagtuga it maeapnagon nga financial ag political crisis sa nasyon.
Nagsumite si Peña it anang resignation, adlaw it Huwebes, Nobyembre 5, apang owa raya ginbaton it Kongreso rason nga nagapabilin nga nagapadayun ro impeachment process kontra kana.
Nauna eon nga gin-aprubahan it Chamber of Deputies ro impeachment complaint kontra kay Peña angot sa gina alegar nga “serious and systematic dereliction of duty” sa anang pakikipag-angot sa banko.
Nagbukas man ro Senado it impeachment trial kontra sa pangueo.
Ginpahayag ni Peña nga maga-atubang imaw sa proseso ag pagadepensahan ro anang kaugalingon.
Kadungan kara, nagbukas ro Paraguayan prosecutors it mga imbestigasyon angot sa pagdumaea sa Ueno Bank, pagbutang it public funds sa banko ag mga naging aksyon it pilang opisyal it gobyerno.
Nag-umpisa ro krisis matapos pakialaman it Central Bank of Paraguay ro Ueno Bank bangud sa grabeng problema sa solvency.
Suno sa mga awtoridad, bumagsak ro capital position it banko sa mas manaba sa katunga it minimum requirement matapos matumod ro pilang problema sa financial records ag lending practices kara.
Milyun-milyong customer ro naapektuhan matapos maduea-an it access sa andang savings ag iba pang pondo kat ginpasarado ro operasyon it banko.
Gina-usisa eon man it mga prosecutor ro pagbutang it mabahoe nga kantidad it public funds sa Ueno Bank, kaibahan ro pondong halin sa mga government institutions.
May mga mamalidha man nga nag-akusa kay Peña it conflict of interest ag iba pang iregularidad bangud sa dati nana nga business ties sa mga grupong konektado sa banko.
Ginpamalibaran man ni Peña ro wrongdoing ag ginpahayag nana nga haum imaw nga makipagbueuligan sa mga awtoridad agud nga maklaruhan ro mga natabu.
Samtang, nagapadayun ro mga hubeag-protesta sa Paraguay samtang ginahinyu it pilang sektor ro saeabton it mga opisyal nga eakot sa krisis.
Padayun man nga ginatumod it Senado ro magiging kapalaran ni Peña samtang nagapadayun ro impeachment trial ag separado nga criminal investigations
