Madinaeag-on nga ginpatigayon it Public Employment Service Office (PESO) Kalibo ro Kalibo Foundation Day Job Fair 2026 ku adlaw it Sabado, Nobyembre 7.
Suno kay John Marden Maigue, manager it nasambit nga taeatapan, nakalista it kapin sa 800 ka mga registered applicants ro nagpasakop sa nasambit nga programa.
Raya sigon ro pinakamaabong aplikante nga nalista sa tanan nga ginpatigayon nga job fair it andang taeatapan, nga nagapamatuod nga maabo pang mga job seekers ro dapa nga mataw-an it serbisyo.
Sa nasambit nga numero, masobra 60% kara ro na-assess bilang mga qualified nga mga aplikante it 32 ka mga employers nga nagpasakop.
Dugang pa nana, kaabuan sa mga aplikante hay mga college graduates, sa pihak nga bukas man ro ibang bakanteng trabaho para sa mga undergraduate ag high school graduates.
Naging man ro nasambit nga job fair para sa mga residente sa guwa it munisipalidad.
Paathag pa ni Maigue, may pilang employers pa ro uwa natapos ro pag-usisa sa mga aplikante bangud sa kaabuon it mga raya, ag bangud eon man sa timprano nga pag-tapos it programa bangud sa naeksperyensyahang power interruption.
Samtang, posible sigon nga raya eon ro pinaka-ulihing job fair nga igapatigayon it PESO Kalibo makaron nga dag-on, sandig sa target karang maka-patigayon it sangka job fair kada quarter.
