Ginpataasan it National Food Authority (NFA) sa hasta sa P30 kada kilo ro presyo it pagbakae it malimpyo ag uga nga paeay samtang gindoble man ro volume it pwedeng maibaligya it kada mangunguma sa hasta sa 500 sako kada cropping season.
Ginpahayag ni NFA Administrator Larry Lacson nga kapin sa 80 porsyento it mga sanga it ahensya sa bilog nga nasyon ro nakabakae eon it malimpyo ag uga nga paeay sa balor nga P30 kada kilo, samtang ro pinakamanabang presyo hay una sa P28.
Suno kay Agriculture Secretary Francisco P. Tiu Laurel Jr., tuyo it mas mataas nga presyo ag ginpaeapad nga procurement limit nga masiguro nga makabaton ro mga mangunguma it mas mabahoe nga kita para sa andang pangabuhian ag ma-engganyo sanda nga magtanum sa pihak it paeag it El Niño.
Ro ginpaeapad nga programa sa pagpamakae it paeay hay nagatuyo man nga suportahan ro pagbilog it rice reserves it gobyerno para sa mga programa kapareho it baratong bugas ag insigidang pagpanupod it bulig sa tiempo it mga bagyo ag iba pang kalamidad.
Agud nga maabot ro mga farmers sa mga maeayo nga lugar, nagabakae eon ro ahensya it 150 mobile procurement trucks samtang nagtaeana man it dugang nga P10 bilyon si Secretary Tiu Laurel agud nga pondohan ro mas ginpabaskog nga pagbakae it paeay makaron nga dag-on ag sa masunod pang mga dag-on.
