Magahimo ag nagahinyo it signature campaign ro Kalibo Poblacion Tricycle Operators and Drivers Association (KAPOTODA) sa pagpanguna it andang presidente nga si Medel Valenzuela agud makabilog it nagakaigong dokumento bilang pagbaeabag sa proposisyong pagpasugot sa mga electric tricycle ukon e-trike nga magbyahe sa banwa it Kalibo
Suno kay Valenzuela, posibleng matuead ro Kalibo sa Boracay kun siin naging sentro it transportasyon eon ro mga e-trike.
Sa pihak nga ginakilaea sigon nanda ro modernisasyon sa sektor it transportasyon, nagakabaeaka imaw nga maaapektuhan ro pangabuhian it ginabueubanta nga 1,988 nga tricycle operators ag drivers.
Ginengganyo man nana ro lokal nga gobyerno nga magpatigayon anay it konsultasyon agud matumod ro numero it mga maapektuhang drivers.
Dugang pa nana, uwa pa it pormal nga konsultasyon ukon pagpupueong nga ginpatigayon kaibahan ro sektor it transportasyon bangud raya hay proposal pa eamang.
Apang nagdesider sanda nga magpatigayon it sa gihapon it nagakaigong tikang agud ipahayag ro andang pagbaeabag.
Ginakabaeak-an man ni Valenzuela nga maabong tsuper ro posibleng mawad-an it pangabuhian kun ipatuman ro proposisyon nga uwa it bastante nga pag-tuon ag konsiderasyon sa andang pangabuhian.
