KALIBO, Aklan—Temporaryong inde maagyan ro access road paadto sa northern ag southern part it Antique.
Raya hay matapos nga masamad ro tulay nga nagasugpon sa banwa it Laua-an ag Bugasong it nasambit nga probinsya.
Suno kay Provincial Disaster Risk Reduction Management Office ukon PDRRMO head Broderick Gayona-Train nga resulta sigon raya it pagbaha sa suba nga tuga it pagbuhos it mabaskog nga uean sa kasagsagan it pagpanaeasa it Bagyong Betty nga mas pang ginpabaskog ro Hanging Habagat.
Bangud kara, malisod ro pagtravel it mga byahero eabi eon ro pagtransport it mga goods and services bangud nga baroto ro temporaryong makaagi sa suba nga ap-at katawo eamang ro pwedeng sumakay.
Ginpaathag ni Train nga ro nasambit nga tulay hay nauna eon nga nasamad ko nagtaliwan nga Bagyong Paeng ag nasundan makaron nga Bagyong Betty.
Angot kara, nag-apela sa publiko si Train nga likawan anay nga magbyahe paadto sa nasambit nga lugar eabi eon kon bukon manlang it importante bangud nga inde man nanda irisgo ro kabuhi it mga commuters.
Hasta alas-5:00 eamang ro pagbyahe it mga baroto ag uwa man sanda ginapasugtan kon mabaskog ro uean bangud nga tuman ka delikado magtabok sa suba.
