KALIBO,Aklan — Magadihon it petisyon sa korte suprema ro Alliance of Concerned Teachers (ACT) Partylist matapos nga ginpirmahan ni Pangueong Ferdinand Marcos Jr. ro kontrobersyal nga Maharlika Investment Fund sa pihak it paandam it pilang grupong maabuso raya ukon magaubos sa pensyon it ordinaryong tawo sa oras nga malugi.
Suno kay ACT partylist representative France Castro, sambilog sa andang mga igakwestyon hay ro teknikalidad it bersyon it MIF nga naging laye eon ngani ag ro legalidad sa paggamit it pondo it pumueoyo nga magahalin sa mga government banks.
Ro Republic Act 11954, nga ginpirmahan it presidente hay tuyo nga suportahan ro economic goals it administrasyon sa pamaagi it pagpatindog it unang “sovereign wealth fund” it gobyerno.
Pagataw-an it RA 11954 it kapasidad ro gobyernong mag-invest sa tanan nga mga importanteng proyekto kaparehas it agrikultura, imprastruktura ag iba pa.
