Ginkundina it Estados Unidos ro ginatawag kara nga “peligroso ag agresibong aksyon” it China matapos ro insidente sa tunga it Chinese Coast Guard ag Philippine Navy sa West Philippine Sea.
Suno sa US State Department, ro ginasugid nga pauman-uman nga pagpang-gulo it China sa lehitimong operasyon it Pilipinas sa kadagatan hay naka-apekto sa kalinong ag kapag-on sa rehiyon ag kabaliskaran sa promisa kara nga solbaron ro mga bagina sa matawhay nga pamaagi.
Nag-abot sa Manila si US Secretary of State Marco Rubio agud nga magtambong sa mga pueong it ASEAN ag uman nga pagpabaskog it relasyon it Estados Unidos ag Pilipinas.
Sa sangka artikulo, ginpamilit ni Rubio ro suporta it US sa kahilwayan sa pag-eayag sa Southeast Asia ag uman nga ginpabakod ro depensa kara sa rehiyon. Suno kana nga magiging paeag sa soberanya, seguridad, ag ekonomiya it mga nasyon ro pagkontrol it sangka gamhanan nga nasyon nga nagagamit it pag-negosyo bilang armas pampulitika.
Nauna eon nga ginpahayag it Armed Forces of the Philippines nga naninahan ro sangka Pilipinong soldado matapos sigon nga bunaean it tawuhan it China Coast Guard sa insidente sa Ayungin Shoal. Ginpamalibaran man it China ro pasibangud ag ginhambae nga masyadong tiko sigon ro bersyon it Pilipinas sa natabu.
