KALIBO, Aklan—Ginpaathag it Aklan Electric Cooperative ukon Akelco nga ro serye it naexperiensiyahan nga power interruptions ag pag-flactuate it kuryente kahapon nga adlaw it Huwebes, Abril 27 hay tuga it power deficiency it National Grid Corporation of the Philippines ukon NGCP kasunod it mataas nga demand tuga it tiempo it tag-init.
Suno kay Engr. Jude Ropa, head it engineering department it Akelco nga bukon eamang it Aklan ro apektado it patay-sindi nga supply it kuryente kundi nga tinamaan kara ro bilog nga Panay ag Negros.
Na-monitor it NGCP ro system disturbance nga naka apekto sa bilog nga Western Visayas bandang ala-1:51 it hapon.
Gindugang pa ni Engr. Ropa nga bukon nanda it kontrolado ro natabu bangud nga ro problema hay sa transmission it NGCP.
Samtang, maskin suno kana ro natabu nga power interruptions ko Miyerkules nga adlaw hay tuga it probelama sa 69-KV it transmission line kara.
Hasta makaron hay owa pa sigon it abiso ro NGCP sa mga nagakatabu bangud nga nagapadayun pa ro andang imbestigasyon.
Sa pihak kara, aminado si Engr. Ropa nga bukon pa it stable ro power supply it NGCP rason nga mabahoe ro posibilidad nga makaangkon eon man it mga panibag-ong unscheduled nga power interruptions.
Nauna eon sigon sanda nga nagpaguwa it abiso sa publiko nga i-switch off anay ag boe-on sa saksakan ro andang mga appliances agud nga indi masamad.
Madumduman nga gin-uean it mga nagkaeain-eain nga batikos ro Akelco bangud sa serye it mga pagkaduea it supply it kuryente eabi pa ag naga host ro probinsiya sa nagapadayun nga Western Visayas Regional Athletic Association Meet 2023.
