Ginrampa it mga modelo ro nagkaeain-eain nga desinyo ag mga koleskyon nga hinimuan ag ginpagkabuladyan it asosasyon nga Aklan Fashion Designers Association (AFDA) ku nagtaliwan nga Nobyembre 23-25 sa Marzon Convention Center sa banwa it Kalibo.
Pagpaathag ni Lyndon Dalida Jr, miyembro it nasambit nga asosasyon nga raya hay para man ipromote ro produkto nga pinya fiber it probinsiya pati man ro mga lokal nga mga fashion designers.
Ro paghimo it mga koleksyon suno kana hay random ukon eain-eain depende sa gusto ag inspirasyon ku mga designer.
Pagpakigbahin nana nga ro anang koleksyon nga “damgo” hay nagalibot sa anang panamgo nga may babayi nga medyo malabo ro itsura ag halin kato naging inspirasyon nana para himuon anang mga pieces.
Nasayuran nga nabilog ro AFDA ku nagtaliwan dag-on nga ginakumpuneran it mga designers nga nagpa-eambong sa mga mabahuean nga tawo, beauty queens ag celebrities sa Pilipinas ag sa ibang nasyon.
Sa makaron sigon suno kay Dalida hay magapahuway anay ro andang grupo bago magplano it panibag-o nga fashion show ukon mga aktibidad.
Dugang pa nana nga magiging katunga nga benepisyaro nanda hay ro igmanghod nga PDL halin Bureau of Jail Management and Penology sa Aklan.
