KALIBO, Aklan—Nag-apela si Aklan governor Florencio Miraflores sa publiko nga intindihon ro anang ginpaguwa nga direktiba nga gina-obliga ro tanan nga mga naga-uli nga Locally Stranded Individuals ukon LSIs nga magsumite it negatibong resulta it reverse transcription polymerase chain reaction ukon RT-PCR test.
Suno kana nga tuyo kara nga maprotektahan ro publiko kamana man ro ikamayad nga eawas it andang pamilya.
Raya hay matapos nga kaabuan sa mga bag-ong positibong kaso sa Aklan hay puro mga LSIs ag returning overseas Filipinos ukon ROFs.
Pila sigon sa mga raya hay naghingabot nga maka-uli ko Hulyo 23 antes ro ginpatuman nga bag-ong patakaran, kun sa siin, gina-require eon ro RT-PCR test imbes nga rapid tests eamang.
Importante man suno kana nga makompleto ro tanan nga mga ginapangayo nga requirements agud nga indi makaangkon it aberya ro andang biyahe.
Mag-eowas sa RT-PCR test result, required man ro mga LSIs nga magsumite it travel authority halin sa Joint Covid-19 Shield ag certificate of acceptance halin sa magabaton nga LGU nga may nagakaigo nga koordinasyon sa andang natungdan nga barangay.
Kinahangean man nanda nga magpaidaeum sa daywang domingo nga isolation sa gintaeana nga ligtas covid center it LGU ukon strict home quarantine.
Engkaso nga makaangkon it sintomas it makamaeatay nga sakit hay insigida ro mga raya nga ginadaea sa covid ward it Aklan provincial hospital.
Sa pihak nga parte, ginklaru nana nga ro aklanon nga kauna-unahan nga namatay sa covid hay idtu binawian it kabuhi sa sangka pribadong ospital sa Iloilo City.
Makabig sigon ro 48 anyos nga pasyente nga comorbid bangud sa naga-eksister nga sakit nga stage 4 breast cancer ag posibleng nabo-oe kara ro virus sa anang pagbiyahe sa Iloilo.
Samtang, owa pa sigon it local transmission ro Aklan bangud nga kaabuan sa mga positibong kaso hay may travel history sa mga high risk areas.
