KALIBO,Aklan– Nag-apela it pakikipagbueoligan ro pamunuan it Aklan Police Provincial Office ukon APPO agud nga matapna ro aktibidad it New People’s Army ukon NPA.
Raya hay matapos nga makumpirmang miyembro it makawaeang grupo ro ekstorsyunistang naaresto nga si Prince Egudas, 34-anyos ag residente it Lahog, Tapaz, Capiz kaibahan si Maria Rita Malandac, 28-anyos, tubong Purok 2 C. Laserna, St. Kalibo apang presenteng naga-istar sa Oton, Iloilo.
Nagpanawagan man si PCol Victorino Romanillos, Acting Provincial Director it Aklan PPO sa mga indibidwal nga nalihis it landas nga bukas ro andang taeatapan kaibahan ro Philippine Army nga haom sanda nga magbaton sa mga magabalik sa sabak it gobyerno.
Mag-eowas kara, may programa sigon nga nakataeana ag nagahueat para kanda agud nga makapangabuhi it maayos ag malinong sa patag.
Nauna eon nga nakumpirma nga ro extortion letter nga nabaton it negosyante nga tag-iya it construction firm hay maghalin sa NPA’s Coronacion Chiva Waling-waling Command kon sa siin ro ginamit nga cellphone number it suspek hay imaw man ro nakabutang sa nasambit nga sueat.
Samtang, ginduea ni PCol. Romanillos ro kabaeaka it publiko bangud nga ro insidente hay makabig nga isolated case bangud nga sa nasambit nga lugar eamang ginpatigayon ro entrapment operation sa suspek.
