Patay ro ap’at nga mountaineer samtang an-om pa ro gina-usoy matapos tamaan it avalanche ro Broad Peak, sambilog sa pinakamataas nga bundok sa kalibutan, sa rehiyon it Gilgit-Baltistan, Pakistan.
Kaibahan sa internasyonal nga grupo it mga hikers ro mga pumueuyo it Estados Unidos, China, Pakistan, Oman ag Nepal.
Ginpangunahan ro ekspedisyon it kilaeang Nepalese mountaineer nga si Nirmal Purja.
Gin-umpisahan ro search and rescue operation matapos ro pag-eumpag it niyebe ku Huwebes, apang temporaryong ginpundo bangud sa maeain nga kahimtangan it tyempo ag ginaeauman nga pagapadayunon sa masunod nga adlaw.
Ro Broad Peak, nga may taas nga masobra 8,000 metro sa bulubundukin it Karakoram, hay ginakabig nga sambilog sa pinakamalisod sakaon nga bukid sa kalibutan ag pilang beses eon nga naging lugar it mga nakakamatay nga aksidente sa pag-hike.
