Nagpanupod it food packs ro lokal nga gobyerno it new washington tulong sa mga residenteng naapektuhan it oil spill sa nasambit nga banwa.
Suno kay New Washington Mayor Jessica panambo nga raya hay kasunod it anang ginpaguwa nga executive order nga temporaryong nagabawae sa pagpangisda sa palibot it Lagatik River ag sa mga kaiping nga kasitiohan partikular sa District 1, 2 and 3 it Brgy. Pinamuk-an, Sitio Malogo, Kamingawan, Riverside ag portion it Tambak sa Sitio Kamanggahan.
Sa makaron hay ginahueat eon lang sigon nanda ro water sample laboratory report it regional office it Bureau of Fisheries and Aquatic Resources angot sa ginpadaea nga water sampling halin sa mga nasambit nga apektadong lugar.
Nauna kara, nagpatigayon it water sampling ro LGU-New Washington kaibahan ro BFAR ag ro mga empleyado it Municipal Agricultural Office sa mga kasubaan nga naapektuhan it oil spill.
Ginhimo ro nasambit nga tikang agud nga masiguro nga eowas ro kasubaan sa nagkalhit nga oil spill maghalin sa lube oil nga tumagas sa gina-salvage nga power barge sa mismong bisinidad it Metallica shipyard sa Brgy. Polo, New Washington.
Dugang pa it alkalde nga nacontain eon ro langis matapos nga naghimo it tikang ro mga natungdan sa bulig it Philippine Coast Guard ag iba pang ahensya it gobyerno ag mga volunteers.
Mabahoe nga bulig suno kana ro ginbilog nga task force sa madasig nga pagresolba it problema.
Sa pihak nga parte, ginabalewala sigon nana ro mga nagapanamad kana eabi eon sa social media ag naga-focus sa anang trabaho bilang ina it banwa.
Dugang pa nga ginapaiway anay nanda ro mga isyu sa pulitika kapin eon ro pagbilog it andang line-up sa maabot nga midterm elections bangud nga mabuhay pa ro eleksyon.
