Arestado ro sangka 26-anyos nga tricycle driver sa ginkasa nga drug buy-bust operation it gintingob nga pwersa it Provincial Drug Enforcement Unit (PDEU) Aklan ag Kalibo Municipal Police Station.
Ro subject person hay ginkilaeang si alyas “White” ag residente it Brgy. Old Buswang, Kalibo, Aklan.
Nabuoe sa anang posisyon ag kontrol ro sangka sachet it suspected shabu kabaylo it kapin sa P4,000 pesos nga buy-bust money.
Sa ginpatigayon it pulisya nga pag-body search kana, narekober dugang ro 10 sachet it suspected illegal drugs ag dried marijuana nga nakaputos sa dyaryo.
Mag-eowas kara, may narekober man kana nga drug paraphernalias ag drug residue.
Si alyas White hay posibleng magapangatubang sa reklamong pag-eabag sa Republic Act 9165 ukon Comprehensive Dangerous Drugs Act of 2002 kon sa siin presente imaw nga nakakulong sa lock-up cell it Kalibo Municipal Police Station para sa nagakaigong disposisyon.
