Preparado eon ro Aklan Police Provincial Office (APPO) para sa paaeabuton nga selebrasyon it Valentine’s Day.
Suno kay PCpt. Aubrey Ayon, tagapaghambae it nasambit nga taeatapan, parte it andang preparason ro mas ginpabaskog nga police visibility ag pagpatrolya pati eon man ro andang pag-kampanya kontra sa mga pagpang-scam, partikular eon ro love scam.
Ro love scam sigon hay ro pagpang-loko gamit ro bukon it andang mga itsura ukon ai generated nga mga profile picture sa social media, kun sa siin tuyo nanda nga bue-on ro imong buot para nga mapangayuan ro sangka biktima ag magtuga man it kahalitan sa emosyonal nga aspeto.
Paathag ni PCpt. Ayon, may mga signs nga posibleng scammer ro kaistorya kapareho it pagbalibad nga makipag-video call, ag gapangayo it eaban hay kwarta maskin nga uwa pa nagkita ukon personal nga nakilaea.
Padumdom nana nga kun bukon pa personal nga kilaea, likawan nga magpadaea ukon magtao it kwarta, indi mag-tao it personal nga impormasyon, ag kun maga-kita sa unang kahigayunan hay pilion ro lugar nga matawo ukon mga public places para malikawan ro mga insidente nga uwa gina-pangamuyu-a.













